ငါ့နာမည် ထိန်လင်း
ဟင်းချက်နည်း အမျိုးမျိုးကို မင်းတို့ အသည်းအသန်တွေးခေါ်နေချိန်မှာ
သူပုန်ထနည်း အမျိုးမျိုးကို အကြိတ်အနယ်ငါစဉ်းစားနေခဲ့တယ်။
နေမ၀င်အင်ပါယာကြီးက
ညည ငါ့အဖိုးဗိုလ်လရောင်ရဲ့ခေါင်းကိုဖြတ်ပြီး ငါ့ရှေ့မှောက် ဒရွှတ်ဆွဲခေါ်လာနေခဲ့တယ်။
အဖွားပြောပြတဲ့
ပုံပြင်တွေ ဇာတ်လမ်းတွေ သရဲတစ္ဆေ၀တ္ထုတွေထဲ ငါရလိုက်တာက
ဦးမင်းရောင်ဆိုတဲ့ အမှောင်မှာဘယ်တော့မှယောင်ကိုင်းမသွားနိုင်တော့မယ့်
ငါ့အတွက်အမြဲတမ်းသစ်နေမယ့် စစ်ပွဲတစ်ခုကိုဖွင့်ဖို့ခလုတ်တစ်ခုပဲ။
ရိုးသားမှုဆိုတာ
အသားမပါပဲ အရိုးချည်းသက်သက်ရာက်လာတတ်ပေမယ့်
ရိုးသားရတာ အရသာရှိတယ်လို့ ဘယ်သူကရိုးရိုးလေး ငါ့ခန္ဓာကိုယ်ထဲ ရိုက်သွင်းသွားပါလိမ့်
အစ်မ(အမေ့)ကို ငါအော်ပြောခဲ့တယ် ‘‘လိမ်ပြောတာ မကောင်းဘူးလို့’’။
ငါ့ကို စကားသိပ်မပြောဘူးတဲ့
တိုင်းချစ် ပြည်ချစ် မျိုးချစ်စိတ်တွေ ငါ့အတွင်းမှာတဒီးဒီး တ၀ီးဝီးစီးဆင်းနေတာကိုငါငေးမောနေမိလို့
ငါ့အပြင်မှာ တ၀ါးဝါးတဟားဟားဖြစ်နေတာတွေကို ငါမကြားလိုက်မိနေတာလား။
အဖိုးရေ
ကျွန်တော်ဟာ အဖိုးရဲ့ မြေးအနှစ် သွေးအစစ် သွေးအသစ်ပါဗျ။
မြစ်တွေဟာ မြင်းတွေလိုစိုင်းလာလည်း
ကျွန်တော် ရအောင်ကူးမယ် ညောင်းဦးဖီးဟာ ကျွန်တော့်ရဲ့ဇာတ်လိုက်ပဲ။
တွေ့ကြသေးတာပေါ့
ခင်ဗျား အိတ်ကပ်ထဲက ဖေါင်တိန်ကို ဗြုတ်ကနဲ ကျွန်တော်ဆွဲမဖြုတ်ခင်
ကျုပ်ပြဒါးရှင်လုံးထဲမှာ ခင်ဗျား မွှမွှကြေအောင် သွက်သွက်ခါလည်ပေရော့လို့
ငါ့ စိတ်ကူးကို ဆူးရော ချိုပါတပ်ထားပေးလိုက်တယ်။
မှတ်ထားဦး
အဖေ ရှင်ဘုရင်ဖြစ်လို့ သားရှင်ဘုရင်လိုက်ဖြစ်လာတာမဟုတ်ဘူး
ငါ့အစ်ကိုအောင်သန်းဖြစ်လို့ သူ့ညီငါ အောင်ဆန်းဖြစ်လာတာ။
ငါ့နာမည် ထိန်လင်း
စိန်တွင်းကြီးတွေလောက်တော့ သနားတယ်။ ။
ခရမ်းပြာထက်လူ
( ၂ ၀ ၁ ၃ )
0 comments:
Post a Comment